Sundawo motaba’g bantay sa Kalag-Kalag

CEBU, Philippines - Ang 78th Infantry Battalion (IB) nga nagbase sa lungsod sa Balamban   gitakdang mopakatap og quick reaction team  sa adlaw sa  mga Santos ug Kalag.

Si 1st Lieutenant Jorry Vinluan sa Philippine Army nga maoy Commanding Officer karon sa 78th IB Bravo Company mibisita  kagahapon sa buntag sa hepe sa Talisay City Police Station nga si Superintendent Eddie Recamara.

Si Vinluan nga nahinabi sa Banat News mibutyag nga sakop sa 78th IB Bravo Company ang habagatan ug tunga-tungang kasadpan (Midwest) sa lalawigan sa Sugbo.

Tanang mga munisipalidad ug siyudad nga ubos sa 78th IB ilang gibisita ug nakighimamat  sila sa mga opisyal sa matag lugar aron pagpahibawo   kalabot  sa ilang kaandam sa pagtubag sa emerhensiya kung ugaling gikinahanglan sa tanang higayon ilabi  na sa Kalag-Kalag.

Gibutyag ni Vinluan nga karong kalag-kalag ug adlaw sa mga Santos duna silay ipakatap mga quick reaction team.

Ang matag team maoy mag-monitor sa tulo ka mga lungsod lakip na ang siyudad.

Ang mga lungsod ug siyudad nga sakop sa 78th IB Bravo Company gi-grupo  ngadto sa tulo-tulo.

Ang usa ka squadron –mo-monitor   sa  Talisay,  Minglanilla ug dakbayan sa Naga   ug adto kini magpundo sa police station sa Minglanilla. Ang  maong grupo mag-roving  sa mga sementeryo sa ilang area of responsibility (AOR) .

Matud ni Vinluan nga ang ilang tumong  mao ang pagtabang sa kapolisan sa pagmentenar sa kahapsay ug kalinaw atol sa nahisgutang selebrasyon.

Sa laing bahin, si Recamara nagkanayon nga sa Nobiyembre 1, 2012  sa alas 6:00 sa buntag hangtud sa Nobiyembre 2, 2012 mopakatap   siya  og mga polis  sa mga sementeryo sa siyudad.

Matud pa niya nga sugod karong adlawa  may idestinong mga polis nga mag-roving sa mga sementeryo aron mabantayan ang mga tawong nanglimpiyo pa sa mga lubong sa ilang minahal sa kinabuhi nga anaa  sa lubnganan.

Sugod sa Nobiyembre 1 adunay ibutang nga mga police assistance center sa matag sementeryo.

Ang siyudad  sa  Talisay  adunay  lima ka mga sementeryo nga mao ang Evergreen Memorial Garden nga nahimutang sa may Cebu South Coastal Road habig sa barangay Tanke, mga sementeryo nga publiko sa Tanke, Cansojong ug Poblacion ug laing pribadong sementeryo nga mao ang Cebu South Memorial Garden nga nahimutang sa barangay Lower Mohon. (WC)(BANAT NEWS)