Samsam 'miendorsar' sa mga Garcia

CEBU, Philippines - Ang apo ni Kongresista Eduardo Gullas sa unang distrito sa probinsiya sa Sugbo nga si Gerald Anthony “Samsam” Gullas kinsa modagan isip kongresista puli sa iyang apohan miendorsar sa magsuong sila si Kongresista Pablo John Garcia ug kang Gobernador Gwendolyn Garcia kagahapon.

Ang magsuong Garcia mianha sa Talisay City Central School sa barangay Poblacion kagahapon sa buntag diin ang kagamhanan sa probinsiya nanghatag og mga school supply sa mokabat 8,000 ka mga estudyante.

Si Samsam kinsa mitambong usab sa maong kalihukan nagkanayon nga pinangga sa mga Garcia ang unang distrito tungod kay kanunay kining mihatag og tabang ug kini matud pa niya magpadayon lang kung tabangan sa mga botante ang mga Garcia sa sunod piniliay.

Si PJ kinsa kongresista karon sa ikatulong distrito ang mokandidato isip gobernador sa probinsiya sa sunod tuig nga eleksiyon ug ang gobernadora kinsa ubos na sa kataposang termino modagan isip kongresista sa ikatulong distrito.

Ang mga Garcia ubos sa One Cebu Party apan nunot sa padayong kisaw sa panag-alyansa sa mga national parties diin masakop ang mga lokal nga partido wala pay gipagawas nga opisyal nga pamahayag si Kong. Gullas kung si kinsay ilang paluyohan sa pagkagobernador. (BANAT NEWS)