CEBU, Philippines - Patay na nga nadiskobrehan ang usa ka registered nurse nga gituohang naghikog pinaagi sa paghigot og habol sa iyang liog sulod sa lawak sa ilang balay sa barangay Canjulao, dakbayan sa Lapulapu sa miaging hapon.
Ang namatay mao si Danica Jane Davila Lopez, 21, dalaga nga nagpuyo sa maong dapit ug nagtrabaho isip nurse sa Seamens Hospital sa barangay Umapad, dakbayan sa Mandaue.
Si PO1 Jomar Florentino sakop sa homicide section sa kapolisan sa Lapulapu City Police Office (LLCPO) nga nahinabi sa Banat News miingon nga ang mga ig-agaw sa namatay mitug-an sa kapolisan nga sa alas 9:00 ang takna sa buntag sa maong adlaw misulod kini sa lawak ug natulog. Apan nianang pagka-alas 3:00 sa hapon ila kining gipukaw aron motambong sa iyang trabaho dihang wala gayud silay tubag nga nabati gikan sa kuwarto niini.
Maoy hinungdan nga misulod sila sa lawak niini ug nakurat na lang sila dihang maoy misugat sa ilang mga mata nga nagbitay na ang dalaga kansang liog gihiktan og habol nga gigaid sa sagbayan sa lawak ang pikas tumoy niini.
Ilang gitangtang ang hikot sa liog ug ila dayong gihatod ngadto sa Mactan Doctor’s Hospital diin kini gideklarar sa mga doktor nga dead on arrival.
Si PO3 Lydo Pinos sa kapolisan sa maong dakbayan miingon nga sa sulod sa lawak nga gikatulgan ni Lopez wala sila makapag og suicide note gawas lamang sa cell phone niini.
Gitataw niya nga bisan sa cell phone niini walay mensahe nga nagsinyas bahin sa iyang paghikog.
Hinuon miingon si PO3 Pinos nga ila kining sutaon kun may problema ba ang maong dalaga bahin sa trabaho, sa pamilya o kaha gugma nga maoy nagtukmod kaniya sa paghikog. (BANAT NEWS)