CEBU, Philippines - Tulo ang patay duha niini mga polis, samtang naangol usab ang laing polis dihang natagak sa pangpang ang ilang patrol car nga gisakyan didto sa Sitio Mag-alambak, barangay Mantalongon lungsod sa Dalaguete kagahapon sa alas 3:00 sa kaadlawon.
Ang namatay diha- diha mao sila si SPO1 Gino Ursonal, hingkod, minyo ug lumad nga taga siyudad sa Bogo, apan naminyo og taga barangay Balud, Dalaguete, PO3 Christopher Requina, 53, nga taga Sitio Tapon barangay Panaguikan, ug ang driver nga si Frederick Caruana, hingkod, nga taga barangay Caliongan, Dalaguete, usa ka casual nga kawani sa lungsod.
Ang bugtong naluwas apan angol sa maong trahedya mao si PO3 Allan Sanoy, 38, nga nagpuyo sa maong lugar.
Si SP01 Veronico Centino, desk officer sa Dalaguete Police Station mibutyag sa Banat News nga ang mga biktima gikan nga nagbantay sa disco party didto sa barangay Dugyan, 10 kilometros ang gilay-on gikan sa Mantalongon nga nagsaulog sa pista sa maong higayon.
Matud ni SPO1 Centino, nga sa ilang pagsukit- sukit kang PO3 Sanoy, nga sa mga alas 2:30 sa kaadlawon dihang ni anam na og kamingaw ang diskohan nananghid sila sa kapitan sa barangay nga mo-pull out na sila aron makapahuway.
Apan sa ilang pagpauli pag-abot sa maong dapit samtang nagdulhog sila sa karsada pag-abot sa lawom nga kimba kalit lang mitipas ang sakyanan ug natagak sa pangpang nga gibana-bana nga may 160 ka tiil ang giladmon.
Apan si PO3 Sanoy nga nakabantay nga paingon na silang mahagbOng nakahigayon pa og ambak hinungdan nga igo lang na-angol human maigo sa bato ug nasangit- sangit sa kahoy.
Unya ang ilang Patrol jeep maoy milahos sa kinailawoman nga bahin nga mitugpa sa batoon nga dapit uban sila si Ursonal, Requina ug Caruana kansang kalawasan nangagupok.
Kagahapon na sa alas 6:00 sa buntag naugkat ang mga patay’ng lawas sa mga biktima. Sila ni SPO2 Clito Pia ug mga kaubanan nga maoy miugkat sa mga biktima naglisud tungod sa kalawom sa maong lugar samtang si PO3 Sanoy maoy gihatud dayon ngadto sa tambalanan.
Si SPO1 Centino nagkanayon nga gubaon na ang ilang patrol jeep nga hinatag sa Probinsiya sa Sugbo
Matod ni SPO1 Centino nga ang maong sakyanan maoy kanunay nilang gigamit kun motungas sila sa bukid samtang ang ilang Toyota Innova nga Patrol car maoy gamiton sa ilang pagpatrolya sa highway.
Ang patay’ng lawas sa duha ka polis hayaon og duha ka gabii sa police station una pa ihatud sa ilang tagsa tagsa ka pinuy-anan.
Dugang ni SPO1 Centino nga si PO3 Requina maoy iyang paris isip desk officer kaniadto, apan niadtong Septembre 3 niining tuiga mihangyo kini nga mag -field na usab aron siya makasuroy suroy sa gawas hinungdan nga mipuli siya kang PO2 Godofredo Glipa.
Samtang gibutyag ni Raydal Cesneros, Municipal Administrator sa Dalaguete atol sa interview sa Bantay Radyo nga mipasalig si Mayor Allan Cesante nga mohatag og hinabang pinansyal sa kabanay sa mga biktima.
Nunot niini si Sr./Supt. Patrocenio Comendador, hepe sa Cebu Police Provincial Office (CPPO) mimando dayon sa pagpakanaog og imbistigasyon pinaagi sa pagpada og mga personnel nga mosusi sa natagak nga sakyanan pagsuta kun kini human error o mechanical failure ba.
Kini human makadawat og report si Sr./Supt. Comenador nga upat ka adlaw pa lang ang maong sakyanan nga gigamit og balik sa kapolisan gikan sa pagpaayo niini. Si Sanoy nga nahinabi sa Banat News mibutyag nga ang iyang pag-ambak sa sakyanan pamahala na lang kun mabuhi siya o dili.
Apan dihang namatngonan niyang buhi pa siya milakaw siya nagtakiang sa kasakit sa iyang lawas ug migamit siya sa iyang armalite rifle isip sungkod nga milakaw sa mga 100 metros nga gilay-on una pa siya makapangayo og tabang sa nagpuyo sa maong lugar.
Si Venancio Geolin, konsehal sa barangay Mantalongon miingon nga nagtuo sila nga may mga engkanto sa maong lugar nga nasuko gumikan sa road widening project nga gipatuman sa kagamhanan sa maong dapit busa daghan na kaayong katingad-an ang lugar nga natagakan sa patrol jeep sa kapolisan.
Matud pa niya nga daghan na kaayong nadisgrasya sa maong lugar ug sagad kanila mangaangol gyud kaniadto sa wala pa kini mapalapdi ang karsada.
Ang labi nilang gikabalak-an karon nga gipadak-an na ang maong dalan mao nga basin daghan nang mangamatay sa maong dapit sama sa nahitabo sa duha ka polis ug sa driver sa ilang patrol car. (BANAT NEWS)