Mag-uuma giluba angol papa sa uyab

CEBU, Philippines - Nalandig sa tambalanan ang usa ka mag-uuma human kini dunggaba sa amahan sa iyang uyab   didto sa sitio Kaulusan, barangay Basak, lungsod sa Sibonga niadtong Biyernes sa kaadlawon.

Ang biktima mao si Dennis Avila Enad, 22, ulitawo, usa ka mag-uuma,   nga taga sitio Katap, barangay Banlot sa nahisgutang lungsod.

Samtang ang suspetsado kinsa daling misibat giila lang sa ngalan nga “Bungkoy yek”, hingkod,   nga taga barangay Candampas lungsod sa Barili ug amahan sa uyab sa biktima.

Sila si PO3 Melbino Manzanades, PO2 Arnold Frenal ug PO2 Jose Palmero kinsa miresponde sa maong hitabo nagkanayon nga si Enad uban sa iyang uyab mitambong og disko sa lugar nga nahitaboan.

Mga ala 1:20 sa kaadlawon sa nahisgutang adlaw namauli sila ug gihatud ni Enad ang iyang uyab   sa balay niini, apan pag-abot nila sa libon nga lugar mga 500 metros gikan sa gidiskohan, kalit lang mitumaw ang suspetsado ug sa wala igong rason gihansakan sa kutsilyo   niini ang tiyan sa biktima.

Human mabuhagay ang daghang dugo sa samad sa biktima, mikaratil dayon og dagan pahilayo ang suspetsado.

Ang biktima gihatud dayong ngadto Dr. Deiparine Medical Clinic sa maong lungsod apan gibalhin kini sa tambalanan sa dakbayan sa Sugbo. Padayon pang gipangita sa kapolisan ang suspetsado.  (BANAT NEWS)