Suspek sa chopchop ladies gipugos?

CEBU, Philippines - “Gipugos ko sa mga police sa pagpirma sa affidavit of confession.” Kini ang testimonya ni Richard Gudelosao, usa sa mga akusado sa ‘chopchop ladies’ didto sa Talisay City niadtong 2008.

Si Gudelosao nagkanayon nga sa Minglanilla Police Station, gisud siya sa ngitngit nga kwarto ug gihulga hinungdan sa iyang pagpirma sa usa ka dokumento. Mipasangil usab siyang gikulata siya sa mga sakop sa Minglanilla Police bisan sa iyang pagpakiluoy nga duna siya’y mga anak.

Wala gihinganlan sa akusado kun kinsa nga polis nga giingong maoy mihulga kaniya. Matud niya nga dihang natanggong siya sa karsel sa Minglanilla police station tulo sila ka priso sa sulod apan siya ray gilain og karsel.

Sa gipadayong cross examination, si Gudelosao nagkanayon nga wala gyud siya’y partisipasyon sa pagpatay nila ni Maria Eva Mae Peligro and Gwendolyn Balasta nga taga Bohol.

Niangkon siya nga hubog ug nakatulog siya adtong Hulyo 24, 2008. Matud niya giingnan siya ni Jojo Cellar, kinsa nakonbikto human mi-plead guilty sa maong kaso nga iyang napatay ang duha kababaye.

Wala siya makasulti sa polis niini tungod kay hubog siya niadtong tungora, miangkon siyang siya maoy tag-iya sa taxi nga gigamit ni Cellar sa paglabay sa putol-putol nga lawas sa duha.

Sa interbyu kang Atty. Julius Caesar Entise sa prosekusyon kini mibutyag nga wala na siya matingala sa tubag ni Gudelosao, matud pa niya si Cellar ilang nahibaw-ang dili makamaong mo-drive.

Ang amahan sa biktima nga si Diosdado Peligro nagkanayon nga gama-gama ra ang testimonya ni Gudelosao. Iyang gipangutana si Attorney Salvador Solima sa depensa giunsa pag-apil sa pangalan ni Gudelosao sa kaso kun wala siya’y involvement. Wala motubag si Solima niini. (/EIM)(BANATNEWS)