Technical group mituon sa kinaiya sa whale shark

CEBU, Philippines - Giumol sa lalawigan sa Sugbo ang usa ka Technical Monitoring Group (TMG) aron motuon sa gitawag nga biodiversity o butang nga anaa sa kadagatan sa barangay Tan-awan lungsod sa Oslob nunot sa nagkadaghang whale shark kun Tuki nga midagsang sa maong lugar apil na ang pagpakaon sa mga mananagat sa maong mga isda nga giingong hulga sa seguridad sa maong matang mananap sa dagat. 

Kini human usab madawat sa buhatan ni Governor Gwendolyn Garcia ang report sa giingong reklamo sa usa ka marine researcher ug mga environmentalist batok sa pagpakaon sa maong mga isda.

May sulat usab nga nadawat ang gobernador gikan kang Regional Director Andres Bojos sa Bureau of Fisheries and Acquatic Resources (BFAR) nga nangayo og baroganan sa lalawigan kalabot sa pagpaundang sa feeding activity sa mga mananagat sa Oslob ngadto sa Whale Shark.

 Gipakanaog ni Garcia ang nahisgutang hukom human   niya ipatawag ang usa ka tigum didto sa iyang buhatan nga gitambungan ni Mayor Ronald Guaren sa Oslob; DENR-7 Regional Director for protected area, wildlife conservation zone and management services (PAWCZMS) Dir. Al Orolfo; Johann Tejado of Bureau of Fisheries and Aquatic Resources BFAR-7 ug ang kahugpongan sa Tan-awan, Oslob Sea Warden and Fishermen Association. Atol sa maong tigum gisabotan nila nga tun-an sulod sa tulo ka buwan ang natural nga kinaiya sa maong mga isda ug ang anaa sa maong kadagatan sa maong lugar nganong ganahan ang maong mga mananap.

Ang TMG gilangkoban sa LGU Oslob; BFAR; DENR Marine Biologist; Biodiversity ug Eco Tourism Expert ug ang DOT nga mao usab ang gisangonan sa pagtuon bahin sa pagdumala sa kampanya sa pag-agni og mga lokal ug langyaw nga mga turista. Subling gipalanog sa gobernador ug sa mayor sa maong lungsod nga ipadayon kining maong ekonomikanhong kalihokan uban sa hugot usab nga pagpatuman sa gipasar niining balaod kalabot sa tuki o buntanding.

Samtang wala usab moluwat sa ilang baroganan ang taga BFAR kalabot sa taho nga miabot sa ilang buhatan kay magpaabot pa kini sa resulta sa ilang pag-monitor sa maong mga isda sa Tan-awan.