CEBU, Philippines - Ang Mines and Geosciences Bureau (MGB) 7 miila sa mga dapit sa siyudad sa Naga ug Talisay nga peligro ug ang sitio Pangilatan sa Barangay Cantao-an sa Naga di papuy-an.
Kini tungod sa pagligid sa mga dagkong bato gikan sa bukid niadtong milabay’ng semana nga mitugpa sa usa ka panimalay ug mikalas sa managtiayong nagpuyo niini nga sila si Dionisio Vilarmia, 42, Julieta, 47.
Warning signs
Ang MGB-7 mirekomendar sa pagbutang og warning signs aron sa pagpahibalo sa publiko nga peligro ang maong dapit.
Sumala pa ni Abraham Lucero, Science Specialist ug geologist nga mipahigayon og imbestigasyon niadtong Septiyembre 8, ang bato nga miligid og 106 metros padulong sa balay sa mga Vilarmina.
Gipasabot ni MGB Regional Director Loreto Alburo nga ang naglagiting nga init ug kalit nga wala’y puas nga pag-uwan maoy makaingon nga mauga ang yuta ug pag-ulan mohumok kini og maayo ug daling maukal ang mga bato sa mga bakilid. (BANAT NEWS)