Mga tulisang menor de edad nangigo

CEBU, Philippines - Upat ka mga batan-ong gipasanginlang tulisan ang mitulis sa upat ka mga pasahero sa usa ka pasaheroan kagahapon sa kaadlawon diha sa barangay Candulawan, dakbayan sa Talisay.

Ang mga biktima mao sila si Rica Cavan, 19, taga barangay Mambaling, dakbayan sa Sugbo, Allyson Saplad, 19, taga barangay Labangon, Gran Eldrich Quijano, taga Deca Homes, lungsod sa Minglanilla ug Stacy King, 18, taga barangay Veto, Minglanilla.

Nadakpan hinuon sila si Nelson Augis, 18 ug ang 15-anyos nga kauban niini samtang gipangita pa ang duha nga nag-edad og 16 ug 17 pulos mga residente sa sitio Cabancalan, barangay Bulacao, dakbayan sa Sugbo.

Sila si SPO1 Mikie Espina, PO2 Stephen Sefuesca uban sa kapitan sa Candulawan, mga kagawad ug mga tanod sa Candulawan ug barangay Bulacao, dakbayan sa Sugbo maoy nakadakop nila.

Ang mga biktima mibutyag nga gikan sila sa kombira sa balay sa ilang higala diha sa Candulawan paingon nang mopauli apan kalit silang gigukod sa mga suspek ug gipangtionan og kutsilyo.

Si Quijano kinsa walay dalang butang diriyot pang duslaka sa usa kay nagdudang namakak siya, ang kauban niyang mga babaye maoy gipanguhaan sa ilang mga bag nga may sulod nga Nikon DSLR camera, cellphone, Ipod, duha ka pitakang may sulod nga kwarta, uniporme sa soccer, spike shoes, ug mga ID. Apan kagahapon sa buntag na-recover sa mga polis ang butang ni Cavan gawas sa iyang pitaka, kwarta, library card, ID ug jersey uniform.

Si Augis nga nahinabi sa Banat News kagahapon nagkanayon nga manglutoay siya og puso ug igo lang siyang gigalgal sa iyang mga barkada samtang ang 15-anyos mipasangil nga gihulga siyang kulatahon ug dunggabon kung dili siya mokuyog.

Sa laing pagpanulis nga nahitabo, usa ka 16- anyos ang mitulis sa kahera sa usa ka videoke bar sa barangay Poblacion sa siyudad sa Toledo kagahapon sa alas 5:00 sayo sa buntag ug gidala ang P800 kapin nga halin niini.

Ang kahera sa bar nga usa usab ka 16- anyos (pangalan gipugngan sa Banat News), mitumbok sa suspek nga naabtan sa kapolisan sa sitio Planta barangay Poblacion sa maong siyudad.

Matud pa ni SPO4 Gil Lastimosa nagtaptap sa nawong ang suspek dihang misulod sa maong bar nga gipanag-iya sa usa ka Farid Baena, dayong tion sa kahera og wala matinong kalibre sa armas ug mideklarar og tulis dayong kuha niini og tualya ug gibulibod sa liog sa kahera. Atol sa hot pursuit operation nadakpan ang suspek sa sitio Planta kinsa positibong gitumbok sa kahera nga maoy mitulis kaniya. (BANAT NEWS)