1936 — Opisyal nga gideklarar nga extinct na ang mananap nga Tasmanian Tiger (Thylacine) kansang katapusang liwat gibuhi diha sa Hobart Zoo sa Tasmania. Ang maong mananap nga susama og iro apan may stripes nga susama sa tigre diha sa iyang mga pangulahiang tiil giingong kaniadto pa gihinayhinayan og patay sa mga mag-uuma sa maong dapit tungod sa pagkabangis niini. Ang Tasmanian Tiger nga sa gabii lang molibud-suroy maoy gidudahang responsable sa pagpamatay sa mga hayopan sa mga mag-uuma. Gisuwayan unta kining pasanayon sulod sa zoo apan napakyas ang mga eksperto.
Submarino
1776—Ang unang submarine sa Amerika nga aktwal nga gigamit sa gubat mao ang American Turtle, nga gigamit diha sa kadagatan atubangan sa New York niadtong mga panahona. Milampos kini sa unang pagsuway pag-atake sa barkong Eagle pinaagi sa pagtanom og bomba sa kasko sa maong barko. Apan dili kaayo dako ang danyos nga nahimo sa maong ‘torpedo’ kay natangtang kini sa kasko una pa kini mobuto. Ang maong submarino nga susama og porma sa pakwan masakyan lang og usa ka tawo nga niadtong higayona mao si Ezra Lee, siya usab maoy nagpedal aron motuyok ang kahoy nga propeller sa kusog nga 3 knots.