Mekaniko dugta nang nakit-an

CEBU, Philippines - Patay na ug nadugta ang 47 anyos nga mekaniko dihang nakaplagan sulod sa iyang pinuy-anan sa bukirang bahin sa barangay Quisol siyudad sa Danao kagahapon sa alas 6:20 sa buntag.

Ang namatay mao si Yulando Bueno, 47, byudo,mekaniko sa usa ka baligyaanan og mga surplus sakyanan ug motorsiklo og nagpuyo sa maong lugar.

Matud ni SPO4 Edgar Gomez sa Danao City Police dihang nahinabi sa Banat News nakaplagan si Bueno sa mga silingan tungod sa pangalisbo sa baho nga nagagikan sa panimalay niini.

Nasuta nga nag-inusara nang nagpuyo sa maong balay si Bueno apan may gilay-on ang balay niini ug sa mga silingan maong dugay nilang nabantayan nga namatay na diay kini.         

Wala pa matino sa kapolisan ang hinungdan sa kamatayon ni Bueno tungod kay gikatakda pa kining ipaawtopsiya. ( /EIM) - BANAT NEWS