37 brgy kap mipasalig og suporta sa mga Garcia

CEBU, Philippines - Ang 37 ka barangay kapitan sa lungsod sa Dumanjug ang mipirma og manifesto sa pagsuporta sa tanang mga Garcia nga mopapili sa eleksiyon sunod tuig.

Ang Association of Barangay Councils gipanguluhan ni Konsehal Antonio Garcia, kapitan sa barangay Bitoon, nga maoy natawhan ni Deputy Speaker Pablo “Pabling” Garcia, kongresista sa ikaduhang distrito sa lalawigan sa Sugbo diin nahisakop ang lungsod.

Nalatid sa manifesto ang pagsuporta sa ABC nilang Gob. Gwendolyn “Gwen” Garcia pagka-senador, Pabling pagka-kongresista, Kong. Pablo John Garcia pagka-gobernador ug Mayor Nelson Garcia sa sama gihapon nga posisyon.

“We are one in Dumanjug in ensuring your resounding victory. Mabuhi ang One Cebu,” nagkanayon ang manifesto.

Gipasabot ni Antonio nga dili ang pagka-payente nila sa mga Garcia ang hinungdan sa manifesto kung dili ang daghang natampo sa mga Garcia sa pagpalambo sa lungsod.

Matud pa niya nga sa wala pa ang mga Garcia, waiting shed ra jud ang naabot sa ilang barangay sa panahon nilang kanhi gobernador Vicente “Ting-ting” dela Serna ug kanhi kongresista Simeon Kintanar.

Sumala pa ni Antonio nga sa dihang napiling gobernador si Pabling sa 1995, nagsugod na og tubod ang mga kaayohan sa ilang barangay ug sa lungsod.

“Subo nga dunay Dumanjuganon nga gusto na sad pulihan sa mga tawo nga way mapaabot kanila,” sumala pa ni Antonio.

Ang mga Garcia nangapud-apod niadtong Biyernes og mga hinabang pinansiyal sa 37 ka barangay ug mga school supplies sa mga tinun-an sa elementarya ug high school lakip na sa mga magtutudlo. Sa samang higayon, ang mga Garcia nangayo na og suporta sa katawhan alang sa ilang pagpapili sunod eleksiyon.

Mokabat sa P4.5 milyones ang napang-apud-apod sa gobernador ngadto sa lungsod ug sa mga barangay atol sa ilang pagbisita sa ilang yutang natawhan.  (BANAT NEWS)