Talisay mopasidungog kang Bahinting ug Robredo

CEBU, Philippines - Si Bise Mayor Alan Bucao sa dakbayan sa Talisay gitakdang mopalabang og resolusyon karong Martes pagpasidungog sa pamilya ni kanhi pilot Capt. Jessup Bahinting tungod sa natampong tabang niini sa zoo keeper nga napaakan og kobra.

Gawas sa pasidungog mitakda usab si Bucao nga mopalabang og resolusyon nga magpadayag og pahasubo sa konseho ngadto sa pamilya ni Bahinting ug alang kang Kalihim Jesse Robredo sa Department of Interior and Local Government (DILG).

Matud niya nga si Bahinting usa ka residente sa barangay San Isidro, Talisay ug angayan lang kining hatagan og pasidungog sa konseho sa pagluwas niini sa kinabuhi sa zoo keeper nga si Rolando Aventurado. Si Bahinting mipagamit sa usa sa iyang abyon sa pagkuha sa anti-venom didto sa Camiguin nga gitambal kang Aventurado. Niadtong higayona si Aventurado nahimutang sa delikado ang kinabuhi human kini mapahiti og kobra didto sa Cebu City Zoo.

Sa laing bahin, si Bucao mibutyag usab nga gawas sa pasidungog alang kang Bahinting mopalabang usab siya og resolusyon pahasubo sa pamilya niini ug kang Robredo.

 Sila si Robredo, Bahinting ug ang Nepalese co-pilot nga si Kshitiz Chand nakabsan sa kinabuhi dihang ang abyon nga ilang gisakyan nga giabyadoran ni Bahinting nahagsa sa kadagatan sa Masbate City niadtong Sabado.

Ang aide ni Robredo nga si Senior Inspector June Paulo Abrazado mao ra ang naluwas sa nahisgutang aksidente.

Si Bucao mihulagway kang Robredo nga lahi sa ubang mga kalihim sa DILG tungod kay sukad nga milingkod kini isip kalihim sa maong departamento kanunay siyang makadawat og komunikasyon niini bahin sa pagpalig-on sa implementasyon sa local government code ilabi na sa good governance, housekeeping ug transparency. ( WC) - BANAT NEWS