CEBU, Philippines - Gibutyag kagahapon ni Mayor Michael Rama nga wala siya makontento sa performance sa Cebu City Fire Marshall nga si Chief Insp. William Tacaldo, Jr. atol sa pagresponde niini sa nahitabong sunog sa dalan M. Velez sa miaging adlaw.
Sumala pa sa mayor nga nakita niya nga wala kaayo matarong paggamit ang mga ekipo sa bombero.
Nagkanayon si Rama nga siya mismo mitabang og hatag og instruksyon sa mga bombero sa dihang nakita niya nga padulong na modako ang kalayo sa usa ka hardware.
Matud pa sa mayor nga importante gyud kaayo ang pinaspasay nga pagpasirit og tubig sa hardware sanglit duna kini mga pintal nga makapadako sa sunog.
Nagkanayon si Rama nga wala gihapon mahuman ang iyang pagpangita og mga alternatibong pamaagi kung unsaon pagpabalik si kanhi fire marshall nga si Sr. Supt. Aderson Comar nga tua na karon gidestino sa National Capital Region. Kahinumduman nga gipahigayon sa miaging semana ang nasudnong lahugay nga gipatuman sa Bureau of Fire Protection (BFP). “Napugngan man gani nato sa una ang pagbalhin ni Comar sa laing lugar, karon na hinuon dili?,” sumala pa ni Rama.
Matud pa sa mayor nga dako ang iyang pagsalig ni Comar gumikan kay nakita gyud niya ang estilo ug ang abtik nga pagresponde niini sa nagkadaiya nga sunog.
Dugang pa sa mayor nga padayon gihapon ang iyang pagsuporta sa mga kinahanglanon sa City Fire Department, gani nakatunol na siya og mga bag-ong firetruck dili pa lang dugay. - Gikan sa Wires/EIM (BANAT NEWS)