Retiradong Army Reservist Colonel napalgang patay

CEBU, Philippines - Naglunang sa kaugalingong dugo nga nakit-an ang kanhi reservist nga nagranggo og Lieutenant Colonel sa Army Reserve Force nga gituohang nagpusil sa iyang kaugalingon pasado ala-una sa hapon kagahapon diha sa Saint Jude Acres, Phase 2 Gonzales Compound barangay Bulacao dakbayan sa Sugbo.

Ang napalgang patay mao si Roldan Gonzales, 80, kinsa napalgan sa ilang katabang nga si Josefina Mahinay nga naglunang na sa dugo diha sa sala sa balay.

Si Mahinay mitug-an sa mga imbestigador nga nakadungog siya og sipang buto sa armas maong dali siyang migawas sa kusina aron mosusi apan nakurat siya pag-abot sa sala nga nagbuy-od na ang iyang agalon ug nagkadugo.

Daling nangayo og tabang si Mahinay sa mga silingan kinsa daling mitawag sa Basak Pardo Emergency Rescue Unit apan sa paghiling sa mga paramedics “zero-zero” na ang vital signs niini o patay na.

Si SPO4 Alex Dacua ang pangulo sa mga imbestigador sa Homicide Section sa maong kaso mibutyag nga ila pang gisuta kung naghikog ba si Gonzales o accidental firing lang ang nahitabo tungod kay walay nakasaksi sa maong insidente.

Si Gonzales matud pang Dacua adunay samad pinusilan sa walang bahin sa iyang tampihak nga milapos sa pikas nga bahin nga maoy hinungdan sa iyang hinanaling kamatayon.

Base sa pasiunang impormasyon nga nakuha nila Dacua walay timailhan nga nakita sa mga kabanay nga kini maghikog. Hinuon nasuta sa kapolisan nga duna na kini sakit ug maglisod na sa pagpagawas sa iyang hugaw ug gamay ra usab kini og kan-on. ( /EIM)  (BANATNEWS)