CEBU, Philippines - Agi og pangandam batok sa natural nga katalagman, ang Department of Environment and Natural Resources (DENR) 7 nagsugod na sa pagpadagan sa P2.3 milyones nga clonal nursery sa Camp 7 sa lungsod sa Minglanilla alang sa mga binhi nga ipananom dinhi sa lalawigan.
Matud pa ni DENR 7 Regional Director Dr. Isabelo Montejo nga ang maong proyekto nakalinya sa National Greening Program (NGP) sa goberno ug kini usa sa mga estratehiya nga giimplementar aron makuha ang gitarget nga pagpananom og 1.5 bilyones ka mga punoan sa kahoy sa mokabat sa 1.5 milyones ka ektaryang luna hangtod sa tuig 2016.
Ang bag-ong nakompleto nga tulo ka ektaryang clonal nursery gipaabot nga mohatag og 20 milyones nga liso hangtod sa tuig 2016 nga mokantidad og kapin sa P18 milyones.
Pinaagi sa pagdumala sa taga Ecosystems Research and Development Services (ERDS), ang giingong clonal nursery sa pagkakaron natamnan na og 230,000 ka mga lubangon sa mga bantok nga bahin niini
Sa miaging Mayo ning tuiga gisugdan sa ERDS ang ilang operasyon sa maong nursery ug nakahatag dayon kini og mga mikabat sa 8.8 milyones sa lumad nga matang sa kahoy nga mamunga. Dugang pa ni Montejo nga intensyon gayud nila nga makabaton og hustong mga materyales sa ipananom og kahoy aron matuman ang pangandoy sa NGP sa kagamhanan.
Ang pagpalanog sa kakahoyan sa palibot maoy usa sa gikinahanglan sa kalikopan aron pagpakgang sa dautang epekto pag-usab-usab sa klima.
Sa imbentaryo nga gipahigayon sa DENR 7 niadtong miaging Hulyo ning tuiga, 23.4 milyones ka mga binhi ang nahipos sa nagkalain-laing mga buhatan niini sa upat ka probinsya sa Central Visayas.
Gimando usab ni Montejo sa tanang field officials nga maatiman pag-ayo ang mga narseriya aron may ipananom nga mga binhi sa mga yuta nga naupaw na sa nagkalainlaing bahin sa nasud. (BANAT NEWS)