Ama-ama gipusil patay sa humabdos

CEBU, Philippines - Namatay ang usa ka ama-ama human kini pusila sa iyang humabdos sulod sa ilang balay sa sitio Balankatuna, barangay Sambag Uno, dakbayan sa Sugbo sa miaging gabii.

Ang biktima nailhan nga si Clyde Solla, 44, usa ka family drayber ug kasamtangang   nagpuyo sa maong lugar samtang ang suspetsado mao si Richard Roxas, 21, ulitawo nga humabdos sa biktima.

Sa pasiunang imbestigasyon sa kapolisan nasayran nga sa wala pa ang pagpamusil ang biktima ug ang suspetsado giingong nag-inom uban usab sa igsuon sa suspetsado nga si RR.

Apan dihang nangalasbag na   naghinisgotay na kini sa ilang mga problema ug hangtod nga nahuman ang ilang inom.

Natulog na ang biktima uban sa iyang kapuyo nga si Amelia, ang inahan sa suspek sa maong higayon dihang misulod ang naulahi sa lawak sa biktima ug way kukaluoy  nga gipusil kini.

Matud pa ni PO3 Lou Pagara sa homicide section sa Cebu City Police Office, nga ila pang gisusi ang tinuoray nga hinungdan sa maong pagpamusil, tungod kay wala man magkaaway ang biktima ug ang suspetsado.

Ang biktima nga naigo sa walang bahin sa iyang ulo namatay dihadiha.

Samtang sa laing bahin usa ka 16 anyos nga bayong-bayong kinsa gipasanginlang nangawat og rice cooker midunggab patay sa 30 anyos nga namasangil kaniya didto sa barangay Cogon-Pardo, dakbayan sa Sugbo sa miaging gabii.

Ang biktima nailhan nga si Alexes Bildad alyas Digoy, 30, nga taga sitio Tayud sa nahisgutang barangay, samtang ang suspetsado gitago lang sa ngalang Boy.

Sumala sa imbistigasyon sa kapolisan nasuko ang suspetsado dihang gipasanginlan kini sa suspek nga maoy mikawat sa iyang (biktima) rice cooker.

Gumikan niini gikomprontasi ni Boy ang biktima nga misangpot sa ilang pagsinumbagay.

Dihang gilupig ang biktima midagan kini apan gigukod sa suspek ug dihang naapsan gitusak ang dughan, abaga ug paa niini sa dala niyang kutsilyo nga maoy hinungdan sa hinanaling kamatayon sa biktima.

Human mahagba sa yuta ang biktima, misibat usab dayon ang suspek ug padayon pang gipangita sa kapolisan. (BANAT NEWS)