CEBU, Philippines - Duha ka dagkong sunog ang mitumaw sa managlahi nga lugar ug oras sa dakbayan sa Sugbo nga nagbilin og dul-an usa ka gatos ka pamilyang walay panimalay ug tinun-ang nawad-an og lawak-saringan.
Pasado alas-10 sa miaging gabii, pipila ka minutos human mahuman ang klase sa panggabii sa City Central Night High School gilamoy sa dakong sunog ang walo ka lawak ug midanyos sa laing walo sa maong tunghaan nga nahimutang sa Osmeña Blvd sa dakbayan sa Sugbo ang maong tunghaan.
Sa pakighinabi sa Banat News ni Cebu City Fire marshal Aderson Comar nakontrolar ang sunog sulod sa 8-minutos ug giisa kini sa Task Force Alpha.
Matud pa ni Comar nga nagsugod ang kalayo diha sa kilid sa canteen sa maong tunghaan nga karaan na kaayo. Tungod niini, ang klase sa night high school kagahapong adlawa gisuspenso una. Gisusi na sa fire investigators ang report nga ceiling fan nga nabiyaang nag- andar maoy hinungdan sa sunog.
Samtang pasado alas-2 sa kaadlawon kagahapon mitumaw usab ang laing sunog diha sa sitio Sto. Niño barangay Quiot dakbayan sa Sugbo nga giisa gihapon ngadto sa Task Force Alpha.
Si Comar mibutyag nga nagsugod ang maong sunog diha sa dos-andanas nga panimalay ni Aquilina Cabaluna. Ang konsehal sa maong barangay nga si Paulina Pasas misaysay nga naangol si Marvin Caballero tungod sa paglayat niini sa bintana gikan sa nasunog nilang gipuy-an. Mibutyag usab si Pasas nga adunay 88 ka panimalay ang hingpit nga naugdaw samtang lima ang nadanyos sa kalayo. ( EIM) - BANAT NEWS