CEBU, Philippines - Giangkon sa officer in-charge sa Human Resources Department sa Cebu City Hall nga si Atty. Evangeline Abatayo nga nanginahanglan pa og daghang empleyado ang nagkadaiyang departamento apan maglisod pa sila og kuha og dugang kawani gumikan kay dili pa igo ang budget.
Gitataw ni Abatayo nga dili siya kahatag og figure ug nakadawat na siya og daghang request sa mga departamento.
Gipasalig hinuon ni Abatayo nga dili kini makaapekto sa operasyon sa City Hall gumikan kay kanunay silang mokuha og mga job orders kung dunay mga special projects ang kagamhanan.
Samtang moabot na ngadto sa 71 ka mga empleyado sa City Hall gikan sa buwan Enero hangtud sa Hunyo karong tuiga ang wala na gi-renew gumikan kay wala makapasar sa ilang performance evaluation.
“Dunay uban nga wala mahaom ang empleyado sa ilang trabaho,” sumala pa ni Abatayo.
Sa pagkakaron gihunong una sa City Hall ang pag-umol og mga interbyu sa mga aplikante gumikan kay dili sila gustong magdahom kini.
Samtang si Mayor Michael Rama mipadayag kagahapon nga pangitaan niya kini og paagi ug posible nga makadugang lang og posisyon kung makakuha siya og supplemental budget ug tagaan og prayoridad ang labing gikinahanglan nga mga posisyon. ( /EIM) - BANAT NEWS