CEBU, Philippines - Nakapili na og rebolto ni Blessed Pedro Calungsod si Cebu Archbishop Emeritus Ricardo Cardinal Vidal nga maoy ilang dad-on didto sa Vatican City atol sa canonization sa Sugbuanong martyr nga iproklamar nga usa na ka Santo.
Sa report sa Cebu Catholic Television Network kagahapon, si Vidal maoy gitahasan sa pagpili sa opisyal nga imahe o rebolto ni Calungsod sa upat sa gipilian nagagikan sa Sugbo, samtang adunay usa nga ginama sa Paete, Laguna.
Kagahapong adlawa, pormal nang gipili ni Vidal ang mamahimong opisyal nga rebolto ni Calungsod nga mao ang ginama sa Paete, Laguna.
Ang rebolto nga adunay gitas-ong upat ka tiil maoy gipili ni Vidal tungod sa daghang similaridad niini sa ilang gituohang tinuod nga dagway ni Pedro Calungsod.
“It symbolized an average 17-year-old Filipino which is the age of Calungsod,” matud pa ni Vidal. “His eyes are round and his hair black which is a typical Cebuano.”
Ang rebolto adunay gikuptang “Bibliya” ug lukay sa Palmera nga matud pang Vidal simbolo sa pagka-martir. Si Calungsod usa ka katekista didto sa Guam nga gipatay sa mga nitibo tungod sa pagpakatap niini sa Kristiyanismo niadtong 1672.
Hinuon giklaro ni Vidal nga ang napiliang rebolto dili mao ang ilang dad-on sa Vatican tungod kay magpahimo pa sila og mas gamay nga replica niini nga maoy ilang dad-on atol sa canonization.
Si Calungsod maoy mahimong ikaduhang Filipino nga Santos sunod ni San Lorenzo Ruiz nga usa usab ka layko nga gipatay didto sa nasud sa Japan tungod gihapon sa pagpakatap sa Kristiyanismo. (BANAT NEWS)