CEBU, Philippines - Hinay kaayo ang bul-og sa mga motorista nga mikuha sa ilang “refund” nga tag P101.25 gikan sa buhatan sa Department of Trade and Industry (DTI) 7.
Matud pa ni Cirinia H. Lambo, Cashier II sa DTI7 nga sugod niadtong Lunes nanghatag sila sa refund ngadto sa mga motorista nga miparehistro sa ilang mga helmet ug napapitlan og ICC nga mga sticker, apan hangtud kagahapon dyutay pa kaayo ang nanguha niini. Kini agi og tubag ug pagtuman sa mando sa ilang ulohang buhatan sa Manila nga ipauli ngadto sa mga motorista ang ilang nabayad sa pagparehistro sa ilang mga helmet ug ang bayad sa gipapilit nga sticker niini.
Matag helmet nga hilngon sa DTI nga mosakar sa ilang gipangayo nga kalidad sa kalig-on gipaninglan og tag P101.25 nga bayad. Gitino sa DTI ang kalidad nga ilang gipangita sa helmet nga gamiton sa mga motorista mao ang kalig-on niini ug di na nila igsapayan sa desinyo kun full face ba nga ngitngit o hayag , o half face ang porma.
Lahi sa gikinahanglan sa kapolisan nga gawas nga lig-on ang kalidad sa helmet, mas pabor sila nga hayag ug makita ang dagway sa magsul-ob sa maong helmet.
Kini aron nga ang kriminal nga magsul-ob niini makabaton og kabalaka busa mnagduha-duha sa pagbuhat og krimen.
Tungod niini mibahad ang kapolisan sa Police Regional Office (PRO)7 ang mo-lobby ngadto sa kongreso nga ipatino sa helmet law nga desinyo sa helmet nga ipagamit sa mga motorista mao kadtong helmet nga lig-on apan sihag ug maklaro ang dagway sa magsul-ob. (BANAT NEWS)