CEBU, Philippines - Naugdaw ang usa ka yati nga nagbalor og usa ka milyon dolyares nga nag-angkorahe diha sa Yatch Club sa Osmeña Wharf sa Brgy. Pusok dakbayan sa Lapulapu kagahapon sa buntag.
Ang nasunog mao ang M/V Valentina nga gipanag-iya sa usa ka Pranses nga si Mitchel Merchant, kinsa gikan pa sa nasud sa Singapore ug tag-iya sa Euro CD Electronics nga usa sa mga locator sulod sa PEZA sa dakbayan sa Lapulapu.
Sa pasiunang imbestigasyon sa kabomberohan sa dakbayan sa Lapulapu nasuta nga mga alas 6:20 kagahapon sa buntag samtang nakaangkorahe ang maong yati sulod sa maong pantalan kalit misilaob ang sulod nga bahin sa maong yati.
Si Junrey Manghihilot usa ka tripulante sa maong yati mipadayag nga nagduda siyang short circuit ang hinungdan sa pag-ulbo sa kalayo.
Sa pagresponde sa kabomberohan sa MEPZ ug Lapulapu City Fire Station naglisod kini pagsud sa maong yati gumikan sa kapuot sa asong migawas.
Ang maong yati gikan pa sa nasud sa Singapore ug sa milabay’ng adlaw pa kini nga miabot.
Gibanabanang mokabat sa one- million dollars ang kantidad sa maong yati. Pipila sa mga yati duol sa M/V Valentina gipanghiklin palayo aron dili maangin. (BANAT NEWS)