Liog gigulgol sa uyab

CEBU, Philippines - Nalandig sa tambalanan ang usa ka 21-anyos nga babaye human giingong gilaslas ang iyang liog sa iyang 17-anyos nga uyab niadtong Biyernes sa hapon sa lungsod sa Minglanilla.

Ang biktima residente sa maong lungsod nakaangkon og samad sa tuong bahin sa liog ug gidala ngadto sa Minglanilla District Hospital.

Si PO2 Nikki Carlo Plarisan, duty desk officer sa Minglanilla Police Station sa pakighinabi niini sa Banat News kagahapon nagkanayon nga misibat na ang suspetsado dihang miabot ang grupo nila ni SPO1 Florante Capangpangan nga miresponde sa alarma.

Ang maong menor de edad padayong gipangita sa kapolisan kinsa giingong nasuko ngadto sa biktima human kini midesisyon nga makigbuwag kaniya.

Sumala pa ni Plarisan tungod sa kasuko sa suspek mikuha kini og kutsilyo ug gigulgol ang liog sa dalaga ug pagkahuman miikyas. Ang paggulgol sa liog gikatahong nahitabo diha sa kwarto sa suspek.

Matud usab ni Plarisan nga ang inahan sa suspetsado ang unang nakabantay sa nahitabo ug maoy mipadala sa biktima ngadto sa tambalanan.

Si Plarisan midugang nga ang mga uyoan sa biktima miadto sa balay sa suspetsado apan giingong wala na usab ang inahan niini diha sa balay. (BANAT NEWS)