P204M alang sa pagkaon sa mga bata

CEBU, Philippines - Dul-an sa P204,648,600 ang gigahin sa Department of Social Welfare and Development (DSWD) 7 alang sa pagpakaon sa 131 ka mga bata sa tanang kalungsoran ug syudad sa Central Visayas pinaagi sa Supplementary Feeding Program (SPF) niining tuiga.

Mao kini gibutyag ni Jaybee Binghay, ang information officer sa DSWD7 kinsa miingon usab nga mokabat   sa 4,019 ka mga Day Care Center (DCC) sa tibook rehiyon ang gipaabot nga makapahimus niining maong programa pinaagi sa paghatag og hot meals atol sa breaktime kalima matag semana kon matag Lunes hangtud Biyernes sulod sa 120 ka adlaw.

Matud pa ni Binghay nga kining maong programa sa paghatag og pagkaon ngadto sa mga bata nga kasamtangang na-enroll sa DCC agi og dugang sa ilang regular nga pagkaon.

Kini maglangkob usab sa mga kabataan nga anaa ubos sa gitawag nga supervised neighborhood play isip kabahin sa kontribusyon sa DSWD ngadto sa Early Childhood Development (ECD) nga programa sa gobiyerno.

Midugang siya nga pinaagi niining SPF gipaabot nga molambo ang nutritional status, attendance rates ug learning achievements sa pre-elementary nga tinun-an.

Ang mga ginikanan maoy modumala sa feeding program base sa giandam nga cycle menu nga gamitan sa lumad nga materyales alang sa pagkaon sa nagkadaiyang kabarangayan.

Matud pa ni Binghay nga gawas sa probisyon mahitungod sa hot meals, pagahimoon usab ang mga komplementaryong aktibidad sama sa deworming, micronutrient supplementation, edukasyon mahitungod sa nutrisyon, sesyon sa Parent Effectiveness Service (PES), Pantawid Pamilya’s Family Development Session (FDS), Pabasa sa Nutrition, pagmonitor sa tubo sa mga bata pinaagi sa binuwan nga weighing ug height taking. Ang budget sa matag pagkaon mokabat sa P13 matag bata sa matag adlaw samtang ang P10 gigahin alang sa pagpalit og sud-an ug ang P3 gigahin usab alang sa Iron-fortified rice nga diin P30 matag kilo nga ipaigo sa 10 ka mga bata. 

Sa maong kantidad ang DSWD-7 maoy direktang mibayad og P47 milyones ngadto sa National Food Authority (NFA) alang sa pagpalit og I-rice ug ang NFA mao usab ang mo-deliver niini ngadto sa tanang Local Government Units (LGU) sa tibuok Central Visayas.

Midugang si Binghay nga ang kapin sa P157 milyones nga budget alang sa sud-an ibalhin ngadto sa tanang 131 LGU sa tibuok rehiyon alang sa gitinguhang lokal nga sud-an nga makita sa ilang tagsa-tagsa ka lugar.

Ang DSWD nanghinaut nga makab-ot ang malipayon ug baskog nga pagsugod sa matag bata kada adlaw isip pampublikong puhonan sa umaabot nga panahon ug nga kini nagtumong nga mapalapdan ang merkado sa mga pamilya nga gisuportahan sa gobiyerno sa tibuok nasud. (BANAT NEWS)