Gwen way salig sa BJMP

CEBU, Philippines - Gisupak ni Governor Gwendolyn Garcia ang  sugyot ni Secretary Jesse Robredo sa Department of Interior and Local Government (DILG) nga ibalhin ang pagdumala sa Cebu Provincial Detention and Rehabilitation Center (CPDRC) gikan sa kagamhanan sa lalawigan sa Sugbo ngadto sa Bureau of Jail Management and Penology (BJMP).

Kini tungod kay ang gobernador walay nakita nga igong basehanan nga mas mapalambo ang pagdumala sa CPDRC kun itugyan kini ngadto sa BJMP.

Usa sa gibasehan ni Garcia mao ang laing nahitabong jailbreak didto sa bilanggoan sa Maguindanao nga gidumala sa BJMP.

Gumikan niini nawad-an og pagsalig ang gobernador   ngadto sa BJMP kun itandi sa pagdumala sa Kapitolyo sa CPDRC diin higpit nga gialimahan ang mga piniriso aron mahimo silang tarong nga lungsoranon iniggawas nila sa bilanggoan.

Usa sa kamatuoran nga maayo ang pagkadumala sa mga piniriso sa CPDRC mao ang pagka-inila na sa    mga piniriso niini sa pagkamaayo mosayaw nga nakapabantog kanila sa tibuok kalibotan.

Alang sa gobernador, dili mahimong ipatuman sa CPDRC ang tinguha ni DILG Secretary Jesse Robredo nga ibalhin ang kontrol sa maong prisohan ngadto sa BJMP gikan sa pagdumala sa lokal nga mga opisyal sa lalawigan, human sa jailbreak nga nahitabo sa Maguindanao.

Matud sa gobernador nga lahi ang sitwasyon sa CPDRC nga gidumala sa kagamhanan sa lalawigan sa Sugbo ug sa uban nga mga prisohan sa ubang mga lalawigan sa nasud.

Samtang si Capitol Consultant on Information, Revenue Generation and Compliance, Rory Jon Sepulveda mipasabot nga ang kagamhanan sa lalawigan sa Sugbo nakahatag sa financial ug management resources nga gikinahanglan sa CPDRC.

Ang maong kalamboan maoy sagad nga kakulangan sa nasudnong kagamhanan sa ilang pagdumala sa mga prisohan sa nagkalainlaing lalawigan pinaagi sa BJMP. (/WC)  (BANAT NEWS)