Akbayan di motambong sa SOCA ni Rama

CEBU, Philippines - Mibahad ang tigpamaba sa Akbayan- Cebu nga si Mikay Dumabok nga dili intresadong maminaw ang iyang grupo sa State of the City Address (SOCA) ni Mayor Michael Rama karong adlawa gumikan sa kapakyas sa mayor paghatag og   programa sa kabatan-onan sama sa iyang gihimo pagsulbad sa mga suliran sa “out of school-youth”.

Matud pa ni Dumabok nga mas giuna pa ni Rama ang pag-atiman sa beautification project sa siyudad luyo sa kadaghang   problema niini nga angayang hatagan og unang pagtagad.

Dugang pa niya nga wala siya’y ideya kun unsang mga proyektoha ang ipanghambog karon ni Rama.

Gani matud niya nga aduna pa’y ubang mga naapektohan sa nagkadaiyang demolisyon kinsa wala pa kahatagi og relocaton site.

“Kami sa Akbayan -Cebu nagtuo nga kung ang mga constituents sa Cebu City maminaw sa SOCA ni Rama maka-suka gyud tungod sa iya unyang mga panghambug sa iyang nabuhat sama sa beautification project nga wala gyud makasulbad sa tinuod nga problema sa mga kabatan-onan,” suma pa ni Dumabok.

Nagkanayon si Dumabok nga dako siya nga uyon sa buhaton sa pipila ka mga sakop sa konseho nga dili motambong karon sa SOCA.

Matud pa niya nga wala gihapo’y pulos kung motambong ang mga tawo sa SOCA gumikan kay puros na lang kini saad.

Samtang si Mayor Rama misaysay nga bisan paman sa mga pagsaway nga iyang nadawat, padayon gihapon siya nga motrabaho.

Matud pa niya nga nagbaha ang iyang mga proyekto sukad siya nahimong mayor apan wala lang kini masayri sa uban sanglit dili siya hilig magpabutang sa iyang dagway kung aduna siya’y himoong proyekto.

Midugang siya nga bahala na og sawayon siya sa mga kaubanan ra niya sa buhat basta makauyon lang kaniya ang mga tawo nga gisilbihan niya ug nakapahimulos sa iyang mga proyekto kay sila may mga botante unya sa election.  - Sanden J. Anadia/WC (BANAT NEWS)