CEBU, Philippines - Wala direktang mohatag og klarong baruganan kun misupak o uyon ba si Cebu Archbishop Jose Palma sa isyu sa pagpahamtang og silot ug P50,000 nga multa ngadto sa mga ginikanan nga masakpang manapat sa ilang mga anak isip disiplina.
Nasayran nga ang Cebu City Council mi-aprobar sa ordinansa nga pagdili sa corporal punishment dili lang sa mga ginikanan apan lakip na ngadto sa mga paryente, guardians, magtutudlo ug housemaids ngadto sa mga bata.
Hinuon si Palma nagkanayon nga nagtuo gihapon siya nga ang mga ginikanan gyud maoy dunay dakong katungod nga mohulma sa pagkatawo sa usa ka bata ug anaa sila’y katungod nga modisiplina sa ilang mga anak sa saktong paagi.
“Katungdanan sa mga parents nga in their grace mo-grow ang mga bata,” matud pa ni Palma. “Ako pud sa una nakasuway og punishment, pero it’s punishment out of love.”
“We must push sa things nga makaayo sa bata ug makahimo niya nga good citizen,” pasabot pang Palma.
Ang ordinansa nga gipanday nila ni Konsehal Lea Japson, Alvin Dizon, Margarita Osmeña ug John Philip Po II laraw usab nga mosalikway sa naandan nang paagi sa pagdisiplina sama sa pagpaluhod sa bata sa asin o monggos.
Gawas sa pisikal nga silot, gidili usab niini ang sakit nga pagpangasaba sa mga bata sama sa pagbalikas, pagsingka ug pagpakauwaw atubangan sa mga kauban niining bata.
Pipila ka mga ginikanan nga gikahinabi sa Banat News dihang gikuhaan og pamahayag kabahin niini apan nagdumili sa pagpahingalan nakasaway sa maong ordinansa.
“Kung mao na mas maayo pang human nato ipanganak ang atong mga anak idiretso na lang nato sila pagbutang sa orphanage kay mura naman hinuon og wagtangan ta og katungod. Kay ngano kanang naghimo anang ordinansaha wala sila makatilaw og latos sa gamay pa sila? Nganong malampuson man na sila karon?” pasabot pa sa usa ka inahan nga retiradong magtutudlo ug dunay duha ka mga anak nga pulos na propesyunal karon. (BANAT NEWS)