CEBU, Philippines - Gikatakda karong Sabado himuon ang ‘on site registration’ sa mga binilanggo sa Mandaue City Jail nga magsugod sa alas-8 sa buntag hangtud sa hapon.
Nunot niini, gikanselar ang adlaw sa pagbisita ugmang adlawa ug himuon kini karong adlawa Biyernes matud pang JO1 Blanche Alino nga nahinabi sa Banat News sa miaging adlaw.
Gatusan ka mga binilanggo ang gikatakdang magparehistro sa Commission on Election (Comelec) ugmang adlawa.
Ang MCJ mipadala nang daan og listahan sa mga pinirisong posibleng makaparehistro aron makabotar sa 2013 local elections.
Si Bing Tesoro nga maoy assistant Comelec officer sa maong dakbayan nga nahinabi sa Banat News miingon nga ang mga binilanggo nga wala pa marehistro maoy ilang hatagan og kahigayonan sa “on site registration” nga ilang pagahimoon.
Ilaha usab i-reactivate ang rehistro niadtong wala makabotar sulod sa tulo na ka eleksyon. Ang makarehistro mao ang mga naa na sa hustong pangidaron sa 18-anyos ug wala pa makombikto sa ilang mga kaso. (BANAT NEWS)