Gikulatang priso giuban sa selda ni Dumpit

CEBU, Philippines - Nag-uban na karon sa usa ka selda ang pinirisong mireklamong nabiktima sa hazing sulod sa Cebu City Jail ug ang kontrobersyal nga si SPO1 Adonis Dumpit nga usa ka high-risk prisoner.

Kini samtang nabalaka ang mga kabanay sa mga bilanggo tungod sa maong balita atol sa ilang pagbisita kagahapon nga adlaw sa ‘dalaw.’                               

Si Supt. Johnson Calub, warden sa Cebu City Jail (CCJ), nagkanayon nga si Oliver Ong, 40, gipabalhin na og selda alang sa kaluwasan niini. Gawas ni Dumpit, adunay laing hamtong nga piniriso ang kauban ni Oliver sulod sa maximum security cell diin sila gipriso.

Matud ni Calub mihangyo ang inahan ni Oliver nga si Nemia human wala makatambong ang iyang anak sa hearing sa kaso niini sa korte tungod kay giingong nabun-og kini ug nakaihi og dugo tungod sa pagpangulata sa laing piniriso.

“Ang tuyo ra gyud sa inahan (Nemia) mao ang ma protektahan ang iyang anak (Oliver),” asoy pa ni Calub.

Gikataho nga gidagmalan ang biktima pinaagi sa pag-paddle og 110 ka higayon sa “bastonero” sa BC 45 nga selda.

Mipadala na og sulat si Nemia ngadto sa buhatan ni President Benigno Aquino III aron matabangan sa iyang anak.

Gihimakak ni Calub nga hazing ang nahitabo sa biktima ug iya lang kini nga gihulagway nga usa ka “pagmaltrato” ug ilaha na kining giimbestigar.

Si Supt. Efren Nemeño, assistant regional director sa Bureau of Jail Management and Penology – 7, mipasalig nga ilang tutukan ang kaso. “Bawal gyud na ang physical contact sulod sa prisohan aron makalikay og kagubot,” asoy pa ni Nemeño.

Matud ni Nemeño nga ilang kasohan ang mga nangulata sa biktima samtang kasong administratiba usab ang atubangon sa mga on-duty nga jail officers atol sa insidente. (BANAT NEWS)