CEBU, Philippines - Gituohan nga sa pagpatuman sa kagamhanan sa K to 12 educational system ang mga Filipino mogawas nga labing maayong laki sa natad sa edukasyon sa umaabot nga panahon.
Mao kini ang napanglantawan ni Dr. Marcial Digamo, ang hepe sa quality assurance and accountability division sa buhatang rehiyonal sa Department of Education (DepEd)7 atol sa Tapok-Tapok sa Sugbo nga gipahigayon sa NS Royal Pension sa miaging Huwebes.
Matud pa ni Digamo nga kung ang mga Insek, Hapon ug uban pang nasud nga daan nang mipatuman sa standard nga gitas-on sa mga tuig sa pagkuha og kurso nahimong adunahan, daw unsa pa kaha ang mga Filipino karong moapas kita sa panukdanan sa edukasyon nga ilang gipatuman.
“Ang mga Chinese ug Japanese kompleto og edukasyon pero di kaantigo mo-inenglis unya nadatu, kita pa kahang mga Filipino nga puwerting larenoha mo-ininglis, unya di moumento?”
Miingon si Digamo nga niining K to 12 inig-graduwar og kurso sa usa ka estudyante dinhi, puwerti nang punoa sa iyang utok sa taas nga kahibawo.
Kini tungod kay ang pagsugnod og edukasyon sa alimpatakan sa usa ka bata sugdan na sa 4 anyos pa lang siya diha sa kindergarten.
Unya mosaka siya gikan sa Grade 1 ngadto sa Grade 10, dayon Junior High School ug Senior High School una pa siya motungtong sa upat o lima ka tuig nga kurso,
Siyarong utoka og di mapuno sa kaalam ug kahibawo nga subra pa man sa kompleto ang kahibawo nga iyang maagian, matud pa ni Digamo. (BANAT NEWS)