CEBU, Philippines - Mikabat sa 71 ka Persons With Disabilities (PWD) gikan sa nagkadaiyang rehiyon sa Kabisay-an ug Mindanao nakadawat sa ilang diploma isip mga gradwado sa Area Vocational Rehabilitation Center 11 ( AVRC) nga usa sa mga pasilidad sa Department of Social Welfare and Development (DSWD) sa barangay Labangon, ning dakbayan sa Sugbo atol sa ika-36 nga Graduation Exercises sa miaging adlaw.
Sa 71 ka mga gradwado, 14 niini nakahuman sa Therapeutic Massage, 9 sa Consumer Electronics, 2 sa Electronic Motor Repair, 14 sa Computer Technology, 7 sa Commercial Arts and Crafts, 9 sa Basic Cosmetology, 8 sa Commercial Cooking, 5 sa Basic Sewing, 1 sa Food Processing ug 2 sa Furniture and Cabinet Making.
Atol sa ilang gradwasyon, si Superintendent Herminia Cabahug sa Training Center sa AVRC 11 misukna sa mga gradwado sa pagpausbaw sa ilang kahanas ug katakus sa pagkaplag sa maayong trabaho aron mapuslan ang ilang naantigohan.
Gawas sa graduation certificates nga ilang nadawat, ang siyam ka mga outstanding trainees nakadawat usab og mga kahimanan nga magamit nila sa labing ikahanas nila sa natad nga ilang naantigohan.
Sila si Olymer Adiva sa Massage, Renen Naason sa Consumer Electronics, Glicerio Escuadro sa Electronic Repair, Melvin Rule sa Commercial Arts and Crafts, Cherrylyn Linao sa Computer Technology, Evelyn Taboada sa Basic Cosmetology, Ryan Joseph Orrilaneda sa Commercial Cooking, Roselo Dejan ug Jesus Eyana sa Furniture and Cabinet Making. (BANAT NEWS)