CEBU, Philippines - Patay nang napalgan ang usa ka construction worker gituohang nalumos sa kadagatan sa sitio Lawis sa barangay Suba-Basbas sa dakbayan sa Lapulapu alas-4 pasado ang takna sa miaging hapon.
Ang namatay mao si Roger Espinosa, 37, nagpuyo sa sitio Tribo sa barangay Suba Basbas sa nahisgotang dakbayan.
Si PO2 John Carlo Jocotan sa Homicide Section sa kapolisan sa maong dakbayan nga nahinabi sa Banat News miingon nga alas-12 sa udto pang nasigpatan si Espinosa nga naglakaw sa baybayon ug milangoy sa dagat.
Apan sa paglabay sa pipila ka oras usa ka Danny Bacalso nakadiskubre kang Espinosa nga naglutaw sa dagat ug wala na maglihok hinungdan nga gisusi kini sa mga tawo ug gitabang sa mga sakop sa Emergency Rescue Unit Foundation.
Pag-abot sa Lapulapu City District Hospital gideklarar kini nga dead on arrival. Gituohang lumos ang gikamatyan niini. BANAT NEWS