CEBU, Philippines - Human itahan sa ginikanan ang ilang anak nga 11-anyos kinsa gitumbok nga aksidenteng nakapusil sa ulo sa kaduwa niining 13-anyos didto sa barangay Pasil niadtong miaging Sabado sa alas-5:00 sa hapon, ang kapulisan sa Homicide Section makig-alayon sa Women’s and Children’s Protection Desk (WCPD) sa Cebu City Police Office (CCPO) aron maimbitar ang maong bata.
Si Sr. Insp.Jul Muhammad Jamiri, hepe sa Homicide Section miingon nga ila pang gitun-an unsay mahimong atubangong kaso sa ginikanan sa 11 anyos sanglit dili man nila kini kapasakaan og kasong obstruction of justice human masuta nga walay tulobagon ang bata. Gawas niini, gidugang niya nga kun andam mopasaka og kaso ang Department of Social Welfare and Development (DSWD)-7 kinsa maoy nagkustodiya sa bata, igo ra silang mo-back-up niini.
Padayon pa nilang giistablisar kung kinsa ang nanag-iya sa armas nga maoy gigamit sa bata ug mahimo bang mapasakaan og kasong illegal possession of firearm ang maong tag-iya niini.
Matud ni Jamiri nga leksyon na kini alang sa mga ginikanan nga iresponsabli.
Samtang sa pagkakaron ang batang 13-anyos nga napusilan sa ulo kasamtangang anaa gihapon sa talandugon ang kahimtang sulod sa Cebu City Medical Center (CCMC). (BANAT NEWS)