CEBU, Philippines - 1867—Natawo si Julio Nakpil sa Manila. Si Nakpil nabantog nga musikero ug sakop sa Katipunan nga nakiggubat sa mga Kastila ug Amerikano. Siya maoy nangasawa kang Gregoria de Jesus, ang biyuda sa usa sa mga bayani nga si Andres Bonifacio. Siya maoy misuwat sa 'Apuntes Sobre la Revolución Filipina (Notes on the Philippine Revolution), nga diin nagtug-an sa gihimong pagtraydor ni Gen. Emilio Aguinaldo kang Andres Bonifacio, Gen. Antonio Luna ug kaniya.
337 – Namatay si Flavius Valerius Aurelius Constantinus Augustus o mas nailang si Constantine the Great, ang emperador sa Roma (306-37). Siya maoy labing unang emperador sa Roma nga nagtugot sa pagkuyanap sa Kristiyanismo ug nanguna sa pagpabunyag sa maong relihiyon.
1455— Ang unang gubat sa 30-tuig nga giyera tali sa mga dagkong pamilya sa Britanya nga gibansagang “War of the Roses” (1455–85). Ang maong giyera sa Britanya (Englatera) mao ang gubat sa mga pamilyang York ug Lancaster alang sa trono sa maong gingharian. Ang pamilyang York nagdala sa taktak o simbolo o badge nga puting rosas samtang ang Lancaster nagdala sa pulang rosas isip mga simbolo sa ilang mga pamilya.
1927—Usa ka kusog nga linog ang mitay-og duol sa Xining, China nga may gikusgong 8.3 magnitude. Kini mikalas og 200,000 ka mga tawo. (BANAT NEWS)