CEBU, Philippines - Namatay dihadiha ang usa lalaki human kini pusila samtang natulog sulod sa ilang balay didto sa barangay Calatagan, lungsod sa Samboan niadtong Biyernes sa gabii.
Si PInsp. Abell V. Laborte sa Samboan Police Station miila sa biktima nga si Jaime Gutib Petiluna, 33, ulitawo’g may kapuyo nga taga Calatagan.
Matud pa ni Insp. Laborte nga segun sa gibutyag ni Janeth Ferrater Binonda, kapuyo sa biktima nga samtang nangatulog sila sulod sa ilang balay niadtong Biyernes sa gabii, usa ka wala hiilhing kriminal mipalusot sa sumbohan sa iyang armas de fuego sa bungbong sa ilang balay ug giluthang ang biktima.
Nasabak ang biktima sa ubos sa tiyan ug sa iyang lubot nga maoy hinungdan sa hinanaling kamatayon niini.
Sa pagkakaron padayon pang gipangita sa kapolisan ang kriminal. (WC) (BANAT NEWS)