CEBU, Philippines - Siyam ka pasahero sa usa ka Minibus ang nangaangol lakip na sa konduktor niini human kini matagak sa katunggan didto sa barangay Dawis Norte sa lungsod sa Carmen kagahapon sa alas 5:30 sa buntag.
Si PO3 Edgardo Papaya sa Carmen Police Station nga nahinabi sa Banat News kagahapon sa hapon miila sa siyam nga nangaangol nga mao sila si Gretchen Amigable, 21, taga Mabolo; Premitiva Pamila, 18, taga Poblacion Borbon; Reynaldo Aliño, 33, taga Luyang Carmen.
Shyianne Nicole Elimino, 17, taga Lahug; Ariel Roxas, 19, taga Guinsay Danao; Nathan Andre Elimino, 13, taga Camagong Lahug; Nolito Briglo Matigas, 44, taga Damulog Sogod; Manolito Elimino, 64, taga Binungcalan Catmon ug Jodelson Densing, 31, taga Maslog Danao ug konduktor sa minibus nga San Isidro Liner nga nagtangag sa plakang GWN-961 nga gimaneho ni Nestor Brignas, 46, taga barangay Salog lungsod sa Tabogon.
Si Brignas nga nahinabi sa Banat News sa telepono mitug-an nga migikan siya sa Tabogon alas 4:15 kagahapon sa buntag paingon sa dakbayan sa Sugbo.
Matud niya nga mipadagan lang siya sa gikusgong 40 ngadto sa 50 kilometros matag takna kay dangog kaayo ang karsada. Apan pag-abot nila sa Dawis Norte, kalit lang natangtang ang tyrad-in sa manobela sa sakyanan hinungdan nga nawad-an na siya og control niini ug miikis-ikis ang dagan sa sakyanan hangtud nga nalimbuwad kini ug natibugsok nga nag-una ang simod sa sakyanan sa kalapukang bahin sa katunggan.
Ang mga angol nga pasahero dali nga gihatod ngadto sa Danao District Hospital apan ang unom niini maoy gidala sa tambalanan sa dakbayan sa Sugbo samtang ang tulo gipagawas lang dayon kay gagmay ra og bun-og sa lawas.
Mitahan sa kapolisan ang drayber sa maong sakyanan ug nagpaabot sa kaso nga isang-at batok kaniya sa mga biktima. (BANAT NEWS)