Lalaki gipatay sa bayaw

CEBU, Philippines - Nakabsan sa iyang kinabuhi ang usa ka lalaki human kini dunggaba sa iyang bayaw tungod sa ilang panaglalis sa sitio Batong sa barangay Cambaro sa dakbayan sa Mandaue sa milabay’ng gabii.

Ang biktima mao si Erwin Archival, 37, taga dakbayan sa Lapulapu ug kasamtangang nagpuyo sa maong dapit samtang ang gitumbok nga miluba kaniya mao si Eddie Bancale bayaw sa biktima.

Matud pa ni Cristina (asawa sa suspek) nga sayo sa milabay’ng adlaw misud sa panimalay ni Archival kay buot kining mohulam og kwarta apan mitumaw ang panaglalis sa duha.

Si Bancale nga wala makauyon sa iyang nabati gikan ni Archival kalit nga midunggab sa biktima, misuway unta og dagan si Archival apan gigukod ug gitiwasan og hansak sa suspek sa liog ug dughan.

Dali usab nga miikyas ang suspek human sa hitabo. (BANATNEWS)