Menor nabukobuko sa shotgun sa sikyu

CEBU, Philippines - Usa ka menor de edad nga gipasanginlang nangawat ang nalandig sa tambalanan human mabukobuko sa shotgun sa gwardiyang nagbantay sa usa ka construction site niadtong Miyerkules sa kaadlawon diha sa barangay Lawaan 2, dakbayan sa Talisay.

Ang gwardiya nga nakapusil mao si James Cesar kinsa daling misibat dala ang shotgun nga iyang service firearm human sa maong hitabo ug padayon pang gipangita sa kapolisan.

Ang mirespondeng sila si PO1 Jude Enemecio ug PO1 Jason Del Campo maoy midala sa bata ngadto sa Talisay City District Hospital apan tungod sa grabeng samad gibalhin kini ngadto sa Vicente Sotto Memorial Medical Center.

Sa imbestigasyon sa kapolisan misulod ang menor uban sa duha ka wala mailhing tawo sa construction site nga gibantayan ni Cesar ug laing gwardiya nga si Lordan Gelaci.

Ang menor nga napusilan giingong nagpas-an og sako nga dunay sulod nga unom ka iron plates nga gituohang gikan sa maong construction site dihang gipasalbahan ug gimandoan sa pagbutang sa sako.

Apan imbes mopatuo midagan kini ug napusilan sa buko-buko ug tuong paa. Duha ka kabhang sa bala sa shotgun ang nakuha sa kapolisan diha sa site ingon man ang sako nga dunay unom ka mga iron plates.

Si Tarucan ug Pablo nga nahinabi sa Banat News mibutyag nga ang maong menor notado nang kawatan ug nasikop na nila kaniadto apan mabuhian ra tungod kay di mangiha ang mga reklamante.  (BANATNEWS)