Gipatay unay sa kauban

CEBU, Philippines - Usa ka anak sa tag-iya og beach resort sa dakbayan sa Talisay gipusil patay sa iyang kauban didto   sa barangay Kalunasan, dakbayan sa Sugbo kagahapon sa ala 1:30 sa hapon.

Ang biktima mao si Antonio Santos, 39, minyo, anak ni Pabling Santos nga tag-iya sa Villa Teresita Resort sa barangay Biasong sa dakbayan sa Talisay, samtang ang mipatay niini wala hiilhi apan kauban niya sa sakyanan nga iyang gimaneho.

Sa pasiunang imbestigasyon nila ni SPO4 Rey Cuyos, SPO1 Ruth Violango ug PO2 Nilo Aventurado sa Homicide Section sa Cebu City Police Office (CCPO) nasayran nga ang biktima nagmaneho sa iyang kolor light blue nga CRV Honda Civic nga nagtangag sa plakang YBH-835 didto sa Subostihas Street, Unit 5 Opra sa barangay Kalunasan.

Si SPO1 Violango nga nahinabi sa Banat News nagkanayon nga ang biktima gituohang gikan sa Cebu City Jail kay giingong aduna kini gibisitahan nga piniriso.

Samtang nagdagan ang sakyanan nga gimaneho sa biktima, pag-abot niini sa subidahon nga bahin sa karsada kalit lang nadunggan sa mga drayber sa habal-habal ang lanog nga buto gikan sa sulod sa maong sakyanan ug gisundan pa kini og laing sunodsunod nga buto sa armas.

Ang sakyanan sa biktima nga nagsubida sa maong lugar inanay nga miatras hangtud nga mibangga ang luyo nga bahin niini sa usa ka poste sa kuryente sa daplin sa karsada.

Unya nakit-an sa mga drayber sa habal-habal nga naabli ang pultahan sa sakyanan dayon mikanaog ang naglingkod niini sa back seat nga wala hiilhing lalaki   ug milakaw sa unahan dayon misakay sa nag-atang nga   motorsiklo. Dihang gisusi sa kapolisan ang biktima nasuta nga nakaangkon kini og tulo ka samad pinusilan sa iyang tingkoy, usa sa walang tampihak ug usa sa walang bahin sa iyang dunggan.

Napunitan sa kapolisan sa crime scene ang duha ka kabhang ug usa ka slug sa .45 nga kalibre sa armas nga maoy gituohang gigamit sa pagpatay sa biktima.

Ang biktima adunay P73 mil nga pulos tagsa usa ka libo ka pesos nga gisulod og sobreng puti sulod sa bulsa sa gisul-ob niini nga short pants.

Daghan nga anggulo ang gisubay karon sa   kapolisan kalabot sa maong hitabo nga naglambigit sa illegal nga drugas. (WC)(BANAT NEWS)