CEBU, Philippines - Mokabat sa 15,000 ka mga kabus nga molupyo sa dakbayan sa Mandaue ang gikatakdang ipasakop sa PhilHealth program sa kagamhanan sa maong dakbayan karong tuiga.
Kini ang gibutyag ni Mayor Jonas Cortes atol sa pagpirma sa Memorandum of Agreement (MOA) uban sa mga opisyal sa PhilHealth nga gipangulohan ni Dr. Eduardo Benzon , ang presidente ug executive officer sa PhilHealth dinhi sa Region 7.
Mitambong sa maong pinirmahay mao ang mga sakop sa konseho sa dakbayan nga gipangulohan ni Bise Mayor Glenn Bercede, mga konsehal nga sila si Jimmy Lumapas, Lollipop Ouano Dizon, Elstone Dabon, Demetrio Cortes ug uban pa.
Matud pa ni Dr. Benzon nga ubos sa maong programa, ang ilang buhatan maoy moabaga sa bayranan sa matag kabus nga sakop sa PhilHealth sa higayon nga malandig kini sa tambalanan .
Si Mayor Cortes miingon nga naglakip sa gitinguha niyang ipasakop sa PhilHealth mao ang mga kawani nga gidestino ubos sa clean and green program sa kagamhanan.
Gitataw niya nga kaadlawon pa ang maong mga kawani manilhig na sa kadalanan sa dakbayan busa gikinahanglang ikapasiguro sila sa PhilHealth insurance tungod sa ka-risgo sa ilang trabaho.
Ang laing sektor nga buot ipasakop ni Cortes sa PhilHeatlh mao ang mga drayber sa traysikol ug traysikad ubos sa rekomendasyon sa kapitan sa barangay sa ilang tagsa-tagsa ka barangay.
Miingon si Cortes nga gitahasan usab niya karon ang City Social Welfare Service Office (CSWSO) sa paghashas sa mga ngalan sa mga molupyo sa 27 ka barangay sa dakbayan.
Gipasabot niya nga ang matag pangulo sa kabus nga pamilya maoy ilang ipasakop sa PhilHeath apan ang PhilHealth card magamit sa tanang sakop sa pamilya nga malandig sa hospital. (BANATNEWS)