Mga konsehal gihuboan sa katungdanan

CEBU, Philippines - Giorganisa kagahapon sa buntag ang mga komitiba sa konseho sa dakbayan sa Sugbo ug gitangtang gikan sa pagka-chairman sa komitiba    ang   mga konsehal nga kaalyado ni Mayor Michael Rama.

Ang natangtang gikan sa pagka-chairman   sa ilang komitiba gihulipan dayon sa mga konsehal nga kaalyado sa Bando Osmeña Pundok Kauswagan (BOPK), ang mayoridad nga grupo sa konseho. Si Konsehal Edgardo Labella kinsa maoy tsirman sa committee on laws gihulipan ni Konsehal Sisinio Andales.

Samtang ang committee on public services nga gipangulohan ni Konsehal Eduardo Rama, napunta na ngadto kang Konsehal Nida Cabrera.

Gihuptan na usab karon ni Konsehal Alvin Arcilla ang committee on agriculture and rural development nga unang gidumala ni Konsehal Joey Daluz kinsa mao karon ang usa sa campaign manager sa Team Rama. Wala hinuon tangtangi sa komitiba si Konsehal Ronald Cuenco sa gihuptan niya nga committee on hospital services and health sanitation bisan pa man nga kaalyado siya ni Rama sanglit una naman kini nga mipadayag nga dili na siya moapil sa bugno sa politika karong 2013.

Si Labella kinsa modagan pagka-bise mayor ubos sa grupo ni Rama miingon nga wala na siya makugang sa maong sitwasyon sanglit iya na kini nga gipaabot sukad siya mibiya sa BOPK. Giklaro hinuon ni Labella nga magpabilin gihapon ang panaghigalaay sa mga kaubanan niya sa konseho ug wala siya magtanom og pagdumot niini.

Ang BOPK nga gipangulohan ni Kongresista Tomas Osmeña maoy moatbang kang Rama sa sunod nga piniliay.  - BANAT NEWS