Rama mimando nahulpang pundasyon ipaayo

CEBU, Philippines - Gimandoan ni Mayor Michael Rama ang Taft Property nga dalion ang pagpaayo sa nahulpa nga pundasyon sa  condominium building  nga  gitukod  niini. Ang  maong  dapit  nga nahulpa niadtong  Martes  sa hapon  nahimutang  sa sitio Taup, barangay Cogon-Ramos  sa dakbayan  sa Sugbo

Gihimo  ni Rama  ang  maong  mando human  sa gihimo niyang   occular inspection kagahapon sa hapon ug nasuta niya nga kinahanglan ang dinalian nga pag-ayo niini aron dili  modako ang hulpa  sa yuta.

Kauban ni Rama sa iyang  pag-inspection  sa dapit  nga  nahulpaan ang mga engineer gikan sa kaulohan nga nagtrabaho sa maong kompanya ug gituyok-tuyok nila ang area.

Gipasaligan hinuon ang mayor sa mga kadagkoan sa Taft Property nga ilang dalion ang pag-ayo  sa pundasyon.

Matud pa sa mayor nga delikado kaayo kun kini dugayon pag-ayo sanglit mohumok ang yuta ilabi na kun mobunok ang ulan. Nasayran nga pipila ka mga apektadong molupyo sa maong dapit  kasamtangang gipahiluna sa mga tulda nga gikan  sa city hall  samtang ang uban kanila namakwit  sa balay sa ilang silingan.

Samtang nagpadayon gihapon ang  imbestigasyon  nga gibuhat sa kagamhanan sa Siyudad sa Sugbo bahin sa hinungdan sa pagkahulpa sa yuta ug mipadala na og mga engineer ug opisyales sa Office of the Building Official sa maong  dapit. Ang mayor mipadayag nga dili pa niya matino kung kanus-a malibkas ang  cease and deceased order ngadto sa Horizon sanglit lapad pa ang imbestigasyon nga gibuhat niini.

Ang kompanya gimandoan usab sa siyudad nga mobutang og guwardiya sa maong  lugar  aron dili kini masudlan og mga tawo gikan sa 15 metros nga distansya.  - BANAT NEWS