Tigtulis sa mga lending collector sikop

CEBU, Philippines - Usa ka notadong drug pusher kinsa   maoy responsabli sa sunod -sunod nga pagpanulis sa mga lending collector ug ahente sa softdrinks sa mga lungsod sa habagatang Sugbo nadakpan didto sa barangay Langkas, lungsod sa Dalaguete niadtong Lunes sa hapon.

Ang suspetsado nailhan nga si Jaime Linares Geolen alyas Johnny, 23, ulitawo, ug nagpuyo sa maong lugar.

Si SPO3 Veronico Centino sa Dalaguete Police Station mibutyag sa Banat News nga nasikop ang suspek sa gipahigayong buy bust operation sa kapolisan nga pinangulohan sa ilang hepe nga si Insp. Dexter Basiergo, human sa pipila ka buwan nga pagpaniid.

Nasakmit sa mga otoridad gikan sa dinakpan ang usa ka plastic nga gisudlan og shabu ug P200 nga minarkahang kuwarta nga silbing paon sa poseur buyer.

Naposasan ang suspek dihang gidawat niini ang maong kantidad agig bayad sa shabu nga gipalit sa polis nga nagpakaaron ingnong mamalitay og shabu.

Dihang gihinol ang lawas niini nakuha sa kapolisan ang lata sa vicks vaporub gisudlan og tulo ka paketeng shabu ug P 500 nga kuwarta nga gituohang halin sa pagpamaligya og gidiling drugas.

Sa imbistigasyon nga gihimo, mitug-an kini nga siyay responsabli sa sunod -sunod nga tulis sa mga lending kolektor sa ilang dapit ug silingang mga lungsod.

Kagahapon sa buntag ang hepe sa Argao Police Station nga si Insp. Alejandro Batobalonos personal nga miduaw sa suspek sa Dalaguete Police Station kauban ang duha ka ahente sa softdrinks sa Cripsland kinsa mitumbok sa suspek nga maoy responsabli sa pagtulis kanila sa milabay’ng buwan.

Gawas sa kasong pagpayuhot og gidiling drugas giandam usab sa kapolisan ang kasong robbery batok sa suspek.

Matud ni SPO3 Centino nga ang kauban sa suspetsado sa pagpanulis nailhan na apan unya na nila ibutyag ang ngalan niini kun madakpan.  - BANAT NEWS

Show comments