Talisaynon gipasidan-an sa sugat karon

CEBU, Philippines - Gipasidan-an ni Superintendent Eddie Recamara, hepe sa Talisay City Police Office ang publiko nga magmabinantayon sa pagsaulog karon sa Pagkabanhaw ni Kristo aron malikay sa disgrasya.

May nakapaniid nga may mga maligo sa dagat nga bisan di kaantigo molangoy magpabelib gyud unya inig-unlod molutaw pay tingga.

Matud pa ni Recamara matag tuig atol sa Domingo sa Pagkabanhaw inighuman gyud og Sugat kang Kristo sa mga simbahan kasagaran sa mga tawo moderetso dayon sa dagat aron maligo uban sa ilang pamilya.

Atol sa maong adlaw gilauman nga mapuno ang mga kabaybayonan o beaches sa Talisay sa mga maligoay.

Ang mga tigpaniid miawhag usab sa mga molupyo sa baybayon sa Talisay nga dili unta iwangan nila ang baybayon ug dili nila kini himoong pansayan kay kuyaw kaayong magmasakit ang mangaligo diha sa maong lugar gumikan sa mga bulkan sa tawo nga magbuntaog sa baybayon nga ukiton sa langaw.

Si Recamara mipahimangno sa publiko nga kadtong mga maligo sa dagat nga magdala og mga bata dili pasagdan ang mga bata nilang kuyog nga walay magbantay aron dili kini malumos o mawagtang.

Kadtong mga nakainom na giawhag usab niyang dili na lang maligo sa dagat aron walay disgrasyang mahitabo.

Gawas niini ang hepe miawhag usab nga ang matag usa magmabinantayon sa ilang mga butang aron dili mabiktima sa mga kiriwan.

Gibutyag sa hepe nga karong adlawa matag pampubliko nga mga beach resort sa Talisay butangan niya kini og mga polis ug police public assistance both.

Gawas sa kapolisan ang mga sakop usab sa Talisay Reaction Emergency Action Team (TREAT) mosuroy usab sa kabaybayonan aron makaresponde dayon kung adunay emerhensiya mahitabo.

Sa laing bahin, hapsay ug walay mga krimen nga nahitabo atol sa pagsaulog sa Semana Santa matud sa hepe sa kapolisan sa Talisay.

Ang hepe midugang nga kanunay silang nagpatrolya sa kadalanan sa siyudad aron dili makahuygo ang mga kriminal sa ilang binuang. (/WC)(BANATNEWS)