CEBU, Philippines - Usa ang patay ug usa ang nangaangol kagahapon sa kaadlawon diha sa South Road Property (SRP) sa dakbayan sa Sugbu human sila mapasok sa ilawom sa 10-wheeler truck ug nabagnos og kapin sa 30 ka metros samtang diha sa ilawom.
Ang namatay sa Cebu City Medical Center mao si Joward Malinab,18, taga Tisa ning dakbayan. Samtang angol ang drayber nga si Junrey Boquida. Apan misibat ang drayber sa 10-wheeler truck nga nagtangag sa plakang YFS-339 nga si Melvin Ragosta. Ang maong trak iya sa kompanyang giabangan sa Inayawan Sanitary Landfill nga maoy maghakot og mga basura padulong sa Consolacion.
Napasok sa ilawom sa trak ang motorsiklo ingon man ang duha ka mga biktima ug milanat dul-an usa ka oras una pa makuha si Malinab sa ilawom ug nadala sa tambalanan.
Si Malinab nakuhaan pa og footage nga nakasulti pa bisan nagkadugo apan sumala pa ni Manuel Tagaan sa Traffic Division nga nahinabi sa Banat News sa telepono kagahapon nakabsan kini sa kinabuhi sa CCMC. (BANAT NEWS)