3 Ka brgy sa Talisay sunogonon

CEBU, Philippines - Tulo ka mga barangay sa Talisay nga gitawag nga fire prone areas o sunogonong lugar nga maoy gibantayan pag-ayo karon sa kabomberohan sa maong dakbayan.

Ang maong   mga barangay  mao ang Tanke, San Isidro ug Cansojong.

Si Talisay City Fire Marshall Vondrad Fernando Dublois miingon nga kasagaran sa mga molupyo sa maong mga lugar magkinabitay nalang og linya sa kuryente nga maoy maghatag og peligro sa kadali ra mosilaob sa sunog sa kuryente nga dili magkadimao ang instalasyon.

Malagmit, ilang tuyuon aron dili na makagasto pa sa pagpa-estalar og kuryente nga linibo ka pesos ang bayad kun electrician gayud ang ilang pa-estalahon. Gibutyag ni Dublois nga kasagarang hinungdan sa sunog mao ang electrical misuse ug ang pagduwa-duwa sa mga bata og pusporo.

Giawhag niya ang publiko nga magmatngon kanunay pinaagi sa pagtangtang gikan sa socket sa mga appliances nga wala gamita ilabi na kung mobiya sa balay nga walay ikabilin nga tawo.

Matud pa niya nga ang pusporo ug lighter kinahanglang siguroon nga ibutang sa lugar nga dili makawhat sa bata.

Gibutyag sa fire marshal nga niadtong tuig 2010 ang Talisay may 11 ka mga insidente sa sunog, 17 sa tuig 2011 ug duha gikan sa buwan sa Enero ug Pebrero niining tuiga.

Aron paglikay sa sunog ang kabomberohan sa siyudad nagpahigayon og inspection sa mga establisamento.

Padayon usab sila sa pagbansay-bansay bahin sa pagtubag sa emerhensiya ug nagpahigayon usab sila og mga seminar ug training ngadto sa mga kabarangayan.

Bahin sa mga fire prone areas, diin usa niini mao ang Tanke, giawhag ni Dublois ang kagamhanan sa Talisay nga pahawanan ang mga kadalanan sa maong barangay aron di maglisud ang mga trak sa bombero sa pagsulod kun adunay sunog nga moulbo sa maong dapit.

Gawas niini girekomendar usab niya ang paggama og mga fire hydrant nga tag-as og barug sa mga lugar nga gagmay og karsada aron adto na ikabit sa bombero ang ilang hose sa tubig sa panahon sa sunog.

Ang Talisay City Fire Bureau adunay tulo ka fire engine truck ug usa ka aerial ladder truck.

Karong Marso 23, 2012 ang kabomberohan magpahigayon og Fire Olympics nga salmotan sa mga tinun-an sa pribado ug publikong tunghaan sa Talisay. (/WC)  (BANATNEWS)