Konseho mosuporta sa katukoran sa YAP-E

CEBU, Philippines -  Gisuportahan sa konseho sa siyudad sa Sugbo ang usa ka executive order (EO) ni Presidente Benigno S. Aquino III nga magtukod sa Youth Assistance for Pre-employment (YAP-E).

Kining maong kamandoan maoy mohatag og kaayohan sa mga nakagradwar sa sekondarya o high school ug kadtong wala makahuman og kolehiyo nga malibre   sa mga bayranan sa mga dokumento nga ilang kuhaon isip requirement o maoy gipangayo sa mga kompaniya nga   aplayan nila og trabaho.

Sa resolusyon   nga gipanday ni Konsehal Alvin Dizon giawhag niini ang National Youth Commission (NYC) nga kinahanglang ipakatap ang kasayoran niining   maong programa sa presidente aron masayran    sa tanan. 

Matud pa ni Dizon nga dinhi sa YAP-E gipahimangno niini ngadto sa mga nagkalainlaing ahensya sa gobiyerno nga dili pabayron ang mga bag-o pang migraduwar sa high school ug mao pay unang higayon sa pagpangaplay og trabaho sa mga kuhaon nila nga police clearance ug uban pang requirement nga isuporta sa ilang aplikasyon.

Matud pa Dizon nga usahay kining maong mga requirement maoy makasabod sa mga bag-ohay pang mangaplay og trabaho kay walay ikalukat niini gikan sa mga buhatan o ahensya nga tigluwat sa maong mga papeles gumikan sa kaapiki sa kuwarta.

Tungod sa kamahinungdanon sa YAP-E misanong dayon ang kagamhanan sa dakbayan sa Sugbo niini ug nalipay kaayo ang Malacañang tungod kay  sa tibuok nasud ang siyudad sa Sugbo maoy unang misuporta sa maong kamandoan, matud pa ni Dizon.

Gumikan niini gaan nalang kaayo ang pagpangaplay unya og trabaho sa mga bag-ong gradwado sa high school matud pa ni Dizon.  - BANAT NEWS