Alyansang Rama - Guardo napanglantawan

CEBU, Philippines - Gibutyag ni Mayor Michael Rama nga midangop na siya sa usa sa mga lig-ong leader sa oposisyon ug negosyanteng si Jonathan “Atan” Guardo ug nangayo siya og suporta niini alang sa eleksyon sa 2013.

Apan ang mayor nagdumili kung unsay ilang gihisgutan atol sa ilang panagtigom apan iyang gipasalig nga mopahibalo ra unya si Guardo sa saktong panahon.

Gumikan niini migawas ang mga pagdudang dunay alyansa puhon nga mahitabo tali sa grupo ni Rama ug sa mga Guardo. Nagkanayon si Rama nga seryoso nga butang ang ilang gihisgotan ni Guardo apan iyang giklaro nga wala’y daganan si Guardo sa sunod nga eleksyon ug igo lang siya nangayo og suporta niini.

Si Guardo maoy kritiko kaniadto ni Kongresista Tomas Osmeña ug midagan na kini pagka-kongresista katulo na ka higayon apan pakyas.

Dugang pa sa mayor nga dunay gitakdang tigom nga ilang buhaton uban sa lider sa Kugi Uswag Sugbo nga si kanhi mayor Alvin Garcia ug siya nanghinaut nga makakuha og positibo nga resulta niini.

Una na nga gipadayag ni Garcia sa miaging semana nga nakauyon siya sa administrasyon ni Rama apan wala pa siya kahukom kung kinsa ang iyang suportahan sa sunod nga eleksyon. Ang grupo ni Rama nagpabilin nga nagpakahilom kung kinsa ang ilang kandidato pagka-kongresista sa amihanang distrito sa Siyudad sa Sugbo.

Tulo ka mga pangalan ang ilang gipilian apan nagdumili sila pagbutyag niini. (BANAT NEWS)