Tensiyon nagpadayon sa demolisyon

CEBU, Philippines - Mitumaw ang tensiyon sa gipahigayong demolisyon sa miaging buntag didto sa lote nga gipanag-iya sa pamilyang Sesbreño sa barangay Lawaan II, dakbayan sa Talisay apan na-uwang usab dayon sa kapolisan busa wala modako ang kagubot. Si Inspector Hugo Rio Ipong sa pakighinabi niini sa Banat News  mibutyag nga ang pamilyang Cuizon mihimo   og barikada aron dili maguba ang ilang balay.

Matud ni Ipong nga ang pamilyang Cuizon mibutyag ngadto kanila nga aduna silay gidusong kaso ngadto sa korte bahin sa pagpalarot sa ilang balay ug wala usab maapil ang ilang ngalan sa writ of demolition nga mando sa korte.

Apan gipasabot ni Ipong nga wala tuod maklaro sa order nga gihinganlan   ang pamilyang Cuizon apan base sa writ of demolition nga giluwatan sa korte ,tanang mga estraktura nga gitukod sa lot 1 sa barangay Lawaan II gimando nga ipaguba gyud.

Hinuon ang maong tensiyon nasumpo   usab dayon kini human mapasabot ang pamilyang Cuizon kalabot sa mando sa korte ug wala na kini mobabag sa demolition team.

Ang nahisgutang demolisyon nagsugod sa alas 9:30 sa buntag ug natapos sa mga alas 3:00 na sa hapon niadtong Biyernes ug wala usab mahuman og guba ang balay sa mga Cuizon. Sa laing bahin, si Henara Cuizon, 62, nagpa-blotter diha sa Talisay City Police Station gumikan sa iyang kabalaka dihang ang sheriff sa korte nga si Constantino Alimurong mitunol kaniya sa writ of demolition order sa korte nga nagmando nga ipaguba ang iyang balay. (BANATNEWS)