Tipos mihugpa sa Tuburan

CEBU, Philippines - Tulo ka mga butang ang girekomendar sa mga sakop   sa Regional Epidemiology and Surveillance Unit (RESU) sa Department Of Health (DOH)-7 sa kagamhanan sa lungsod sa Tuburan aron mapugngan ang pagdagsang sa typhoid fever o tipos sa maong lugar.

Si Rennan Cimafranca, chief epidemiologist sa RESU sa DOH-7 nagkanayon nga usa sa ilang gihimo mao ang pagtukod og clinic sulod sa covered court sa Poblacion aron dali rang makatubag sa panginahanglan sa mga molupyo.

Ikaduha, ang   tubig nga imnonon sa katawhan ilang buboan og hyposol aron masanta ang kagaw niini, ug ang ikatulo mao ang pagbutang og chlorinator sa lungsod nga maoy ihabwa sa kagaw nga nahisagol karon sa ilang tubig nga imnonon.

Nagtuo si Cimafranca nga   ang tubig nga  gikan sa puso o kaha sa natural nga tinubdan nga sag-obanan og imnonon sa katawhan maoy nasudlan og kagaw nga nahimong sinugdanan sa sakit nga tipos.

Sa pagkakaron nakapabalaka sa mga molupyo      sa maong lungsod ang pagsaka sa gidaghanon sa mga pasyente sa tipos.

Sayo niini mikabat sa 447 ka tawo ang nataptan sa tipos apan 49 ra niini ang anaa karon gipatambalan sa Tuburan District Hospital ug tulo na ang namatay.

Ang DOH 7 mipaubos sa Tuburan sa typhoid fever  outbreak niadtong Huwebes   human masayri ang kagrabi sa kakusog sa pagpanakod sa maong    sakit.

Karong adlawa magtigom ang mga health worker sa maong lungsod aron suroyon nila ang mga barangay kansang molupyo nagmasakit na og tipos.

Ang Tuburan gilangkoban sa 55 ka barangay apan gituohan nga ang nasabak ug naigo sa tipos mao kadtong mga molupyo nga nakainom sa tubig nga gikan sa tubo sa tubig nga nataptan og kagaw. - Lesley Caminade Vestil/WC (BANAT NEWS)